Isang nakalulungkot na aksidente ang naganap sa isang highway sa Maryland kung saan isang kotse na sumalubong sa maling direksyon ang bumangga sa kasalubong na sasakyan, na ikinasawi ng mag-inang taga-Virginia.
Ayon sa pahayag ng Maryland State Police (MSP), bandang 6:45 ng gabi noong Agosto 29, isang Ford Mustang na bumabaybay pahilaga sa maling direksyon sa southbound lane ng I-270 Spur malapit sa Bethesda ang sumalpok nang harapan sa isang Toyota Camry na nasa tamang linya.
Dahil sa aksidente, dalawang sakay ng Camry na kinilalang ang inang si Musammat Shamima Begum (46, residente ng Burke) at ang anak na si Ariba Jahin (23, residente ng Alexandria) ang nasawi sa mismong pinangyarihan.
Sa oras ng insidente, apat katao ang lulan ng Camry, kabilang ang 62-anyos na lalaking drayber at isang 8-taong-gulang na batang babae. Agad na isinugod sa kalapit na ospital ang drayber at ang bata matapos ang aksidente upang malunasan, at hindi pa ibinubunyag ang eksaktong tindi ng kanilang mga pinsala.
Batay sa imbestigasyon, ang drayber ng Mustang na nag-counterflow ay nakilalang si Jose Caballero Nolasco (32), residente ng Germantown, Maryland. Masusing iniimbestigahan ng pulisya ang posibilidad na nagmaneho si Nolasco sa ilalim ng impluwensya ng alak o droga na naging dahilan upang hindi siya makapagmaneho nang maayos.
Agad na inaresto ang suspek na si Nolasco sa mga kasong: 2 bilang ng gross negligence manslaughter, 2 bilang ng homicide by motor vehicle while under the influence of alcohol, at 1 bilang ng causing life-threatening injury by motor vehicle. Kasalukuyan siyang nakapiit nang walang piyansa sa Montgomery County Detention Center sa Rockville.