1776 оны 9-р сарын 6-нд үүсгэн байгуулагдсан... Тойргийн түүхийг эргэн дурсах дурсгалын арга хэмжээ болон наадам боллоо
Мэрилэнд мужийн хамгийн олон хүн амтай Монтгомери тойрог үүсгэн байгуулагдсаныхаа 250 жилийн ойг тохиолдуулан олон төрлийн баярын арга хэмжээг зохион байгуулж, бүс нутгийнхаа түүхийг эргэн дурсах утга учиртай цаг мөчийг өнгөрүүлж байна.
1776 оны 9-р сарын 6-нд байгуулагдсан Монтгомери тойрог нь нам гүм хөдөө аж ахуйн тосгоноос эдүгээ 1 сая гаруй хүн амтай Мэрилэнд мужийн хамгийн том, гол түшиц хот болон хөгжжээ.
Монтгомери тойргийн засаг захиргааны тэргүүн Марк Эрлих мэдэгдэлдээ "Үүсгэн байгуулагдсаны 250 жилийн ойд хүрнэ гэдэг нь маш чухал үйл явдал боловч бид өөрсдийн түүхээ зохих ёсоор тэмдэглэн өнгөрүүлэхийн тулд өнгөрсөн үеийн алдаа дутагдал, бараан түүхтэйгээ ч гэсэн илэн далангүй нүүр тулан ярилцах хэрэгтэй" хэмээн эргэцүүлэн тунгаахын чухлыг онцлон тэмдэглэв.
Монтгомери тойрог 9-р сарыг дуустал тус тойргийн үүсэл хөгжилд манлайлсан гол хүмүүс, түүхэн газрууд болон үйл явдлуудыг тодотгон харуулсан олон төрлийн хөтөлбөрүүдийг хэрэгжүүлнэ.
Нөгөөтэйгүүр, 250 жилийн ойн долоо хоногийн үеэр орон нутгийн уламжлалт Хөдөлмөрийн баярын (Labor Day) арга хэмжээ мөн зохион байгуулагдлаа. Кенсингтон болон Гейтерсберг хотуудад орон нутгийн байгууллагууд, урлагийн хамтлагууд, төрийн албан хаагчид оролцсон Хөдөлмөрийн баярын парад болж өнгөрөв.
Үүнээс гадна тус тойргийн удирдлагууд ирэх 9-р сарын 11-ний өдөр Роквилл хотын Кортхаус Сквер паркад "9-р сарын 11-ний халдлагын 25 жилийн ой"-н дурсгалыг хүндэтгэх ёслолыг зохион байгуулна. Энэхүү дурсгалын арга хэмжээний үеэр тухайн үед амиа алдсан Монтгомери тойргийн 11 иргэнийг оролцуулан 3000 гаруй хохирогчид болон газар дээр нь ажилласан аврах багийнхны эрхэм дээд золиосыг хүндэтгэн дурсах юм.