ጠቅላይ ፍርድ ቤት የዋይት ሀውስ የድግስ አዳራሽ ግንባታ ለጊዜው እንዲቀጥል ፈቀደ… በአስቸኳይ ይግባኝ ክርክር ወቅት አስተዳደራዊ እገዳ አዘዘ

የፌዴራል ጠቅላይ ፍርድ ቤት በዋይት ሃውስ ውስጥ የድግስ አዳራሽ ግንባታ ለጊዜው እንዲቆም የወረደውን የበታች ፍርድ ቤት ትዕዛዝ በማገዱ፣ ግንባታው ለጊዜው እንዲቀጥል አስችሏል።

የጠቅላይ ፍርድ ቤት ዋና ዳኛ ጆን ሮበርትስ የትራምፕ አስተዳደር ያቀረበውን አስቸኳይ የይግባኝ አቤቱታ ለመመርመር ጊዜ ለማግኘት ሲባል የዋይት ሃውስ የድግስ አዳራሽ ግንባታ እገዳ ትዕዛዝ ላይ አስተዳደራዊ እገዳ (Administrative Stay) መወሰናቸውን አስታውቀዋል። በዚህም መሠረት የይግባኝ ሰሚው ፍርድ ቤት ያስቀመጠው የግንባታ ማቆሚያ የጊዜ ገደብ ለጊዜው ታግዷል።

ቀደም ሲል የይግባኝ ሰሚው ፍርድ ቤት መጠነ ሰፊው የድግስ አዳራሽ ግንባታ ፕሮጀክት የኮንግረስን ፈቃድ የሚፈልግ ሊሆን ይችላል በማለት ግንባታው እንዲቆም ትዕዛዝ ሰጥቶ ነበር። የጠቅላይ ፍርድ ቤት አስተዳደራዊ እገዳ እርምጃ አብዛኛውን ጊዜ ለጥቂት ቀናት የሚቆይ ሲሆን በዚህ ጊዜ ውስጥ ፍርድ ቤቱ ግንባታው ይቁም አይቁም በሚለው ላይ የመጨረሻ ጊዜያዊ ውሳኔ ይሰጣል።

ፕሬዝዳንት ትራምፕ በትሩዝ ሶሻል (Truth Social) በኩል "በዋይት ሃውስ እየተገነባ ያለው የወታደራዊ እና የድግስ አዳራሽ ውስብስብ ሕንፃ ለብሔራዊ ደህንነት እጅግ አስፈላጊ ነው" በማለት ለውሳኔው ምስጋናቸውን ገልጸዋል።

የአስተዳደሩ ወገን የድግስ አዳራሹ ግንባታ ከ5 ፎቅ የከርሰ ምድር ወታደራዊ/የአስቸኳይ ጊዜ መጠለያ (ባንከር) ግንባታ ጋር የተገናኘ በመሆኑ ከፕሬዝዳንቱ እና ከዋና ዋና ባለስልጣናት የግል ደህንነት እንዲሁም ከብሔራዊ ደህንነት ጋር በቀጥታ የተያያዘ ነው ሲል ተከራክሯል። በጠቅላላው 600 ሚሊዮን ዶላር ይፈጃል ተብሎ በተገመተው በዚህ ፕሮጀክት የድግስ አዳራሹ ሚሳኤልን የሚቋቋሙ አምዶች እና የድሮን መከላከያ ጣሪያ የታጠቀ ሆኖ የመሬት ውስጥ መገልገያውን የሚከላከል ጋሻ ሆኖ ያገለግላል።

በአንፃሩ የታሪክ ቅርሶች ጥበቃ ብሔራዊ ትረስት (National Trust for Historic Preservation) ይህ ግንባታ የዋይት ሃውስን ታሪካዊ እሴት እና ገጽታ የሚያበላሽ እንዲሁም የፕሬዝዳንቱን ስልጣን ያለአግባብ መጠቀም ነው በማለት ግንባታው እንዲቆም ክስ መስርቷል።

ጠቅላይ ፍርድ ቤቱ የአስተዳደሩን አስቸኳይ የእገዳ ጥያቄ በመጨረሻ ይቀበለው አይቀበለው የሚለው ከተጨማሪ ችሎት በኋላ በቅርቡ ይወሰናል ተብሎ ይጠበቃል።